کراچی ( احرار) صوبہ سندھ کے دارالحکومت کراچی میں فائرنگ کے واقعے میں 3 سگے بھائی جاں بحق ہوگئے۔ میڈیا رپورٹس کے مطابق یہ افسوسناک واقعہ نیو کراچی کے علاقے گبول ٹاﺅن کے قریب پیش آیا جہاں فائرنگ کے واقعے میں 3 سگے بھائیوں کی جان لے لی گئی، پولیس کو وقوعہ سے نائن ایم ایم کے 14 اور تیس بور کے 12 خول ملے ہیں۔
واقعے کے حوالے سے پولیس نے بتایا ہے کہ تینوں بھائی چوکیدار تھے جن پر 6 سے 7 ملزمان نے فائرنگ کی، جس کے نتیجے میں تینوں بھائی موقع پر ہی جاں بحق ہوگئے، ابتدائی تحقیقات میں واقعہ ذاتی دشمنی کا معلوم ہوتا ہے تاہم معاملے کی تہہ تک پہنچنے کے لیے مزید تفتیش کا سلسلہ جاری ہے۔ ادھر صوبہ سندھ ہی کے شہر لاڑکانہ میں ایک ٹریفک حادثہ پیش آیا جس میں ہسپتال سے صحتیاب ہوکر گھر واپس آنے والے ایک ہی خاندان کے 5 افراد جاں بحق ہوگئے، لاڑکانہ میں وگن روڈ پر دھند کے باعث کار اور ٹریکٹر میں خوفناک تصادم ہوا جس کے نتیجے خواتین اور بچوں سمیت 5 افراد جاں بحق ہوئے جن کا تعلق ایک ہی خاندان سے تھا، حادثے میں ٹریکٹر ڈرائیور اور مزدور بھی زخمی ہوئے، حادثے کی اطلاع ملتے ہی پولیس اور ریسکیو ادارے جائے وقوعہ پر پہنچ گئے، لاشوں اور زخمیوں کو اسپتال منتقل کیا۔
پولیس کی طرف سے بتایا گیا کہ حادثے میں جاں بحق افراد میں ایک خاتون، بچی اور تین مرد شامل ہیں، جاں بحق افراد ایک ہی خاندان سے تعلق رکھتے تھے اور رتوڈیرو کے رہائشی تھے، کراچی سے علاج کرانے کے بعد واپس اپنے گھر رتو ڈیرو واپس آ رہے تھے کہ دھند کے باعث حادثہ پیش آگیا۔ دوسری طرف حیدر آباد میں سن کے قریب انڈس ہائی وے پر ٹریفک حادثے میں 10 افرادجاں بحق اور متعدد زخمی ہو گئے، ٹرک اور بس میں تصادم سے 13 افراد زخمی بھی ہوئے، ٹرک اور بس میں حادثے کا واقعہ سن کے قریب ٹھیڑی پھاٹک کے پاس پیش آیا، حادثے میں جاں بحق 10 افراد افراد میں دو خواتین اور دو بچے بھی شامل ہیں، جاں بحق افراد کا تعلق بہاولپور سے بتایا گیا۔
0 Comments